Happy Birthday Bawihte

“Aw Lalpa that zia hi, temchhin ve tehreng u’
Sakeibaknei vanglai an riltam pawhin,
Tlakchham reng ka nei si lo…”

February thla laihawl kan chuang chhuak tan a, Jaipur lam pan turin kan inbuatsaih a. La kal ngai loh ram a kal tur kan nih avangin kan helhhawlh in kan phur kher mai. Lunglei to Aizawl chu kawng te a lo tha tawh nen, motor chuan ninawm ti hman lutuk lovin kan thleng a. Atuk chuan Lengpui atangin chawhnu dar 1-ah kan thlawk chhuak ta a. Kolkata atanga kan connecting flight neih chu zan dar 9 vel daih a lo ni mai. Airport-ah chuan kan flight nghakin kan thu ta ran mai a.

Kolkata to Delhi flight chu Indigo a lo ni a. Keini zin thang lo tih takah,flight-ah eitur an provide tawhlo ang tihngaihna hre hek lo le, Kolkatta airport-a thil themhlem te te chauh kan ei leh biscuit khawro pack 2 ka lei nen chauh, zan dar 11:30 velah Delhi kan thleng thla a. Zan a rei tawh nen, kan thlenin tur kan zawng hmu zo ta lo. Riltam takin kan vak kan vak mai a.

Vanneihthlak takin French embassy-a thawk mizo tlangval Danny-a inah kan tlu lut ta rawih a. Amah a lo awm lova, a nau te khan flight-ah engmah kan ei lo a ni tih ngaihna an hre lo a ni chek ang chu, chaw min offer ta si lo. Chumi zan chu mattress chhah ting ul ul chungah pum ri ruk rukin kan mu ta a. Tum ram thlen hma hauhin damchhunga theihnghilh tawhloh tur experience kan ngah hman hle mai.

A tuk zingah Isac-an taxi min koh sak a, Jaipur pan tur Bus dinnaah min thlah a. A hma zan atang riltam sa kan ni bawk a, bus station-ah chuan nidanga tui kan tih em em ngai lem loh pawh kan eiin kan in bawrh bawrh mai a, tichuan tluang takin chhun dar 12 velah Jaipur chu kan tleng ta a. 3 Star Hotel min lo book sakah chuan kan inghat ve ta rawih a. Jaipur chu a boruak a lo danglam ta deuh a niang chu Bawihte, nang pawh chu i hlimin i nu pum chhungah chuan i che nasa mai a. ‘Pink City’ an tih na chhan an khawhlui vel fanga kan vah pah te khan i nu pumah khan i lo chet nasat ve kha! Kan driver hmuihmul sei pui, kual ruih mai a zuah, hmel bumro tak te kha i hlau rilru deuh thin te chu a lo ni lo maw? Mahse, amah han belhchian hnu kha chuan pa zaidam leh tihnuam pui roh a lo nih kha.

Hetih lai hian thla 5 i la tling lo deuh a. Haw lamah Delhi cham pahin Apollo Hospital-ah inentir kan rilruk a nih kha. Tichuan, Doctor thiam 3 rual chuan uluk takin an han en ta che a, kan beisei phak loh thu thinthawng tak mai min hrilh ta anih kha. I nu phei chu, Mizoram House kan thlen phei leh hnu leh a zan thleng pawhin a khat tawkin a tap reng a nih kha. “In naupai hi ‘Vohbik’ a ni mai thei a, vawiina kan test neih zawng zawng-ah chuan ‘Vohbik’ anih theihna chance hi mi pangngai anih theihna chance aiin a sang zawk a, chumi chian tur chuan a nu pum atangin fluid la chhuak in kan test leh ang a, kan rinhlelh hi lo dik anih chuan, in rem tihna in ‘khawvel eng’ hmu ve lo law law turin kan siam mai ang” an ti anih kha. Khami zan khan kan phak tawkin, thinlung zawng zawng leihbua-in Pathian kan au anih kha. Kan chhungte ho pawh min lo tawngtaipui turin kan phone a. A tuka Apollo Hospital kan va kal leh chuan “Final test chu kan ti tawh lo mai ang, ‘Vohbik’-a a lo piang anih pawhin Hmangaih takin kan lo kuangkuah mai ang” tiin kan chhang ta anih kha.

Haw lamah lah chuan, Delhi airport atang rengin, thlawhna chhungah darkar 2 aia rei mah thlawk chhuak si lovin min han khung a. Chutah, Kolkatta atang chuan Imphal min han kualpui te te a, “Mizoram-ah chhum a chhah avangin a tum theih loh” tiin Kolkatta min panpui leh a. Hotel fahrah takah, kan thawmhnaw bungbawr tak nen kan lut leh a, atukah chuan Lengpui-ah kan tum ta hram a. Thaw chu ven thawkhat chuan a veng ta.

Mahse, Doctor te thusawi kha rilru-ah a cham reng a, i nu-in a pai chhung zawng che chuan rilru hlauthawng reng chung leh Pathian au reng chungin kan awm anih kha. Nimahsela, Pathian thatna i chungah leh kan chungah a lo lang a, 17 June, 2009 zing lam dar 4 velah chuan khawvel eng hmu-in, nau pangngai, keini i nu leh pa leh i chhung te tan phei chuan, khawvela nau hmeltha ber leh fing ber ni turin i lo piang chhuak ta. Khatih laia kan lawmna leh Pathian hnena kan lawmthu kan thlen kha Pathian pawh a lawmin ka ring!

Tichuan, naute enkawl nuam leh fel tak lo ni chhovin, vawiin i piancham hmasa ber kan lo thlen hian, Pathianin i nu pum chhung atanga a kaihhruaina che leh i pian hnu atanga vawiin thlenga a kaihhruaina che zawng zawng ka rilru-ah a lo lang thar uai uai a, he thu hi i pualin, Pathian hnena lawmthu sawi belhchhahnan leh Pathian thatzia ‘Misual’ pakhat talin an lo hmuh ve theih na anih beiseiin ka han thai lang ve a ni e. ” Happy First Birthday Bawihte!”