Kan inah sap a lo leng

Sap ngaisang ta lua  ka an duh hmel. Zep nak emaw, keini aia hnam upa zawk leh tawnhriat ngah na na chu ngaihtuahna chawhmeh min hlui tu an ni leh thin.

Irinni chhun khan ka phone a lo ri ral ral a, ka nupui a u a lo ni a. Lungleiah kan lo kal a, kan lo tlawh zawk ang che u, a rawn ti a. Kan kawmchhaka kan antam huana antam chi ka han theh zo ka chhuk thla leh an lo thlen a inrual chiah a. Sap pachal lian pui mai a lo hruai chu lo niin.Inchhungah ka han hruai lut a, 'black coffee' dawm pah chuan kan ti ti luam a. USA-a an Presbyterian Pastor, Aizawla tih tur neia a lo kal chu Lunglei a hmuh chak vangin ka nupuia u chuan a lo hruai phei chu lo niin. A beisei angin Lunglei a hmu em? Mizoram chu engnge a ngaihdan? Tih lam phei chu ka lo zawt lem lova.
Kohhran chungchang te kan sawi luam a. Kohhran pakhatah member engzat nge awm tlangpui tih te, kohhran pakhat pastor engzatin nge vil tih te min zawt a. Kohhran pakhatah member 800 te leh a aia tam te, chu chu pastor pakhatin a vil a, anih loh pawhin pastor pakhatin kohhran pali emaw a aia tam te a vil tho tiin ka hrilh a. Tin, upa engemawzat kan neih thu leh dam chhung atana upa atana thlan anih thu ka sawi bawk a.Anni lamah chuan Kohhran pakhata member 800 chin awmnaah chuan Pastor pahnih an neih thin thu leh upa te chu tun hnuah chuan damchhung atana thlan annih loh thu leh, upa te chuan pulpita thu an sawi ve loh thu a sawi a. Mak ka tih deuh avangin upa chu engvanga damchhung atana thlan an nih ve loh tih ka zawh chuan, tun hma chuan damchhung atana thlan annih ve tho thin thu leh tunlai khawvel thar zelah Kohhranah pawh 'change' a tul ve thin zia te, chu 'change' chu 'Upa Min', 'Kumhlun' an awm chuan a thlen mawhzia an hriat chhuah tak avanga 'term' neia Upa thlang ta annih thu a sawi a. Tin, an term khat chu kum thum a ni tlangpui a, chu an term a zawh chuan kum khat tal an chawlh a ngaih thu a belh zauh bawk a.

Ka ngaihtuahna thui tak a kal tir a, Mizoram-ah hian practice ve ta ila, tun aiin Kohhran a nung zawk angem? Mihring hrim hrim hi 'change' reng tur a siam kan niin, kan change loh hian 'Siamtu' kan ti lungawilo reng zawk angem?

Ka Fanu Thlalak thenkhat

 

Mizoram economy leh Sawrkar hnathawk

Article ziah hi a har a, inzir tir mai ka ni. Vei zawng ka nei ve thin a, mahse, ka ngaihtuahna ha hi tuai hriam a la ni lo in ‘ha hlam’ ang chauh a la ni. Chu ha hlam ziau deuh chang chuan ka phone-a notepad ah hian ka thai ka thai a, Biakin-ah te, Office ah te, Mitthi vuinaah te, inneih lawmpui tura kalnaah te…zanlaia ka thangharh te pawhin ka thai zel a. Chu notepad chhungthu chu tuna ka rawn post pawh hi a ni. Hmun hrang, hun hranga thuziak belhkhawm chu a thu, ‘a flow’ pawh a inmillo teuh ani tih i hmu thei ang.

Sorkar hnathawk kan nih ve hma atang daih tawh pawh khan pay a danglam dawn apiangin media lamah pawh sawrkar hnathawk pay chungchang thuziak leh sawi a tam. Thil, kei aia chhut chiang lo/chhut bing lutuk ho hian Sawrkar hnathawk ho hlawh hi a tam lutuk tih lam hawia an thu ziak hmuh tur tunhnai pawh hian a tam malh malh hle mai. Sawrkar hnathawk ve ka nih takna tlang atang ni lovin, Mizoram economic dinhmun ka lo thlir ve na atang zawkin ka hmuh dan kan sawi ve dawn chhin teh ang.

Kum hnih khat dawrkai tawh chin chuan an hrechiang a ni. Sawrkar hnathawk ho tamzawk hlawh lak har thla, April hian inhralh a har a, tin, thla tir lam Sawrkar hnathawk ho hlawh lak hlim leh thla tawp lam a ’sale’ hi a tlangpuiin a inthlau tih hi. Hei hian chiang taka a tarlan chu, Mizoram economy chu Sawrkar hnathawk ho hlawh hian a hril a ni (directly proportional) tih hi.

Chuti anih si chuan, kan ram hruaitu ho hian kalphung thar min chuan chhuahpui hma si chuan engatinge sawrkar hnathawk ho hlawh pung tur leh hlawha lungawilo thawm vel hian a mimir hi min tihbuaiin kan va itsik em em? A tak takah chuan sawrkar hnathawk hlawh a pun a, hlawh an lak that chuan a sawrkar hnathawk lo, nitin inhlawhfa chawp te hlei hlei pawh hian kan hlawk pui a ni tih lam hi kan chhut tlem a ni lo maw?

Sawrkar hna thawk section thenkhat ten kan economy leh kan ram inrelbawlna mil lovin hlawh sang an phut/hlawha lungawilo tih hi chu phat chi a ni e ka ti lo. Mahse, dawr-a (essential comodities dawr ni lo) a thla tir leh thla tawp ’sale’ a inthlauh dan em em-ah hian, sawrkar hnathawkin hlawh an lak tam chuan an hman a tam a, chu chu a sawrkar hnathawklo te pawh hian kan hlawkpui a ni tih hi a chiang a ni lawm ni? Chumi man pha lo leh sawrkar hnathawk ho er em em hi kan va tamin chumi lam hawi thuziak hi a tam em?

Mihring chu MAHNI HMASIAL saa piang kan ni. Sawrkar hnathawk pawh, thawklo pawh mahni hmasial kan ni. Mahse, sawrkar hnathawk ho hian mahni hma an sial a, hlawh tam an phut a, an hlawh a tam hian, tun Mizoram dinhmunah chuan, a thawk ve lo te hma min sialpui a ni tih hmu thiam hi kan tam lo niin ka hria. Misual ho hian hei hi kan lo ngaihtuah ve ngai em le?

Happy Birthday Bawihte

“Aw Lalpa that zia hi, temchhin ve tehreng u’
Sakeibaknei vanglai an riltam pawhin,
Tlakchham reng ka nei si lo…”

February thla laihawl kan chuang chhuak tan a, Jaipur lam pan turin kan inbuatsaih a. La kal ngai loh ram a kal tur kan nih avangin kan helhhawlh in kan phur kher mai. Lunglei to Aizawl chu kawng te a lo tha tawh nen, motor chuan ninawm ti hman lutuk lovin kan thleng a. Atuk chuan Lengpui atangin chawhnu dar 1-ah kan thlawk chhuak ta a. Kolkata atanga kan connecting flight neih chu zan dar 9 vel daih a lo ni mai. Airport-ah chuan kan flight nghakin kan thu ta ran mai a.

Kolkata to Delhi flight chu Indigo a lo ni a. Keini zin thang lo tih takah,flight-ah eitur an provide tawhlo ang tihngaihna hre hek lo le, Kolkatta airport-a thil themhlem te te chauh kan ei leh biscuit khawro pack 2 ka lei nen chauh, zan dar 11:30 velah Delhi kan thleng thla a. Zan a rei tawh nen, kan thlenin tur kan zawng hmu zo ta lo. Riltam takin kan vak kan vak mai a.

Vanneihthlak takin French embassy-a thawk mizo tlangval Danny-a inah kan tlu lut ta rawih a. Amah a lo awm lova, a nau te khan flight-ah engmah kan ei lo a ni tih ngaihna an hre lo a ni chek ang chu, chaw min offer ta si lo. Chumi zan chu mattress chhah ting ul ul chungah pum ri ruk rukin kan mu ta a. Tum ram thlen hma hauhin damchhunga theihnghilh tawhloh tur experience kan ngah hman hle mai.

A tuk zingah Isac-an taxi min koh sak a, Jaipur pan tur Bus dinnaah min thlah a. A hma zan atang riltam sa kan ni bawk a, bus station-ah chuan nidanga tui kan tih em em ngai lem loh pawh kan eiin kan in bawrh bawrh mai a, tichuan tluang takin chhun dar 12 velah Jaipur chu kan tleng ta a. 3 Star Hotel min lo book sakah chuan kan inghat ve ta rawih a. Jaipur chu a boruak a lo danglam ta deuh a niang chu Bawihte, nang pawh chu i hlimin i nu pum chhungah chuan i che nasa mai a. ‘Pink City’ an tih na chhan an khawhlui vel fanga kan vah pah te khan i nu pumah khan i lo chet nasat ve kha! Kan driver hmuihmul sei pui, kual ruih mai a zuah, hmel bumro tak te kha i hlau rilru deuh thin te chu a lo ni lo maw? Mahse, amah han belhchian hnu kha chuan pa zaidam leh tihnuam pui roh a lo nih kha.

Hetih lai hian thla 5 i la tling lo deuh a. Haw lamah Delhi cham pahin Apollo Hospital-ah inentir kan rilruk a nih kha. Tichuan, Doctor thiam 3 rual chuan uluk takin an han en ta che a, kan beisei phak loh thu thinthawng tak mai min hrilh ta anih kha. I nu phei chu, Mizoram House kan thlen phei leh hnu leh a zan thleng pawhin a khat tawkin a tap reng a nih kha. “In naupai hi ‘Vohbik’ a ni mai thei a, vawiina kan test neih zawng zawng-ah chuan ‘Vohbik’ anih theihna chance hi mi pangngai anih theihna chance aiin a sang zawk a, chumi chian tur chuan a nu pum atangin fluid la chhuak in kan test leh ang a, kan rinhlelh hi lo dik anih chuan, in rem tihna in ‘khawvel eng’ hmu ve lo law law turin kan siam mai ang” an ti anih kha. Khami zan khan kan phak tawkin, thinlung zawng zawng leihbua-in Pathian kan au anih kha. Kan chhungte ho pawh min lo tawngtaipui turin kan phone a. A tuka Apollo Hospital kan va kal leh chuan “Final test chu kan ti tawh lo mai ang, ‘Vohbik’-a a lo piang anih pawhin Hmangaih takin kan lo kuangkuah mai ang” tiin kan chhang ta anih kha.

Haw lamah lah chuan, Delhi airport atang rengin, thlawhna chhungah darkar 2 aia rei mah thlawk chhuak si lovin min han khung a. Chutah, Kolkatta atang chuan Imphal min han kualpui te te a, “Mizoram-ah chhum a chhah avangin a tum theih loh” tiin Kolkatta min panpui leh a. Hotel fahrah takah, kan thawmhnaw bungbawr tak nen kan lut leh a, atukah chuan Lengpui-ah kan tum ta hram a. Thaw chu ven thawkhat chuan a veng ta.

Mahse, Doctor te thusawi kha rilru-ah a cham reng a, i nu-in a pai chhung zawng che chuan rilru hlauthawng reng chung leh Pathian au reng chungin kan awm anih kha. Nimahsela, Pathian thatna i chungah leh kan chungah a lo lang a, 17 June, 2009 zing lam dar 4 velah chuan khawvel eng hmu-in, nau pangngai, keini i nu leh pa leh i chhung te tan phei chuan, khawvela nau hmeltha ber leh fing ber ni turin i lo piang chhuak ta. Khatih laia kan lawmna leh Pathian hnena kan lawmthu kan thlen kha Pathian pawh a lawmin ka ring!

Tichuan, naute enkawl nuam leh fel tak lo ni chhovin, vawiin i piancham hmasa ber kan lo thlen hian, Pathianin i nu pum chhung atanga a kaihhruaina che leh i pian hnu atanga vawiin thlenga a kaihhruaina che zawng zawng ka rilru-ah a lo lang thar uai uai a, he thu hi i pualin, Pathian hnena lawmthu sawi belhchhahnan leh Pathian thatzia ‘Misual’ pakhat talin an lo hmuh ve theih na anih beiseiin ka han thai lang ve a ni e. ” Happy First Birthday Bawihte!”